14 نصيحة عملية للحفاظ على أداء سيستم كاميرات المراقبة الخاص بيك..

14  نصيحة عملية للحفاظ على أداء سيستم كاميرات المراقبة الخاص بيك..

دايما الغرض الأساسى من تركيب كاميرات المراقبة فى مكانك هو حماية ممتلكاتك من الإقتحام والسرقة والتخريب عن طريق تسجيل كل حاجة بتحصل بره وجوه المكان على مدار اليوم، هنتكلم الأول عن بعض المشاكل الشائعة اللى ممكن تواجهها فى تركيب وصيانة سيستم المراقبة الخاص بيك.

- مشاكل عامة واللى بتمنع السيستم من العمل بشكل مظبوط، بما فيها تسجيل الفيديوهات، وتسجيل حالات الحركة داخل المكان والتنبيه بيها.

- الكابلات المستخدمة فى التوصيل طويلة أوى أو جودتها رديئة.

- ضعف مستوى الدعم الفنى بعيداً عن المشاكل التقنية اللى ممكن تقابلك.

- مشاكل أثناء ربط سيستم المراقبة بالإنترنت للمراقبة عن بُعد.

- عدسات الكاميرات غير مناسبة لمراقبة وتغطية الأماكن بالشكل المطلوب.

 علشان تتأكد وتضمن إن سيستم كاميرات المراقبة يفضل شغال بشكل مظبوط، لازم يكون فيه صيانة دورية بتتعمل للسيستم واللى ممكن تقدر تعملها بنفسك. وده هيساعدك إنك تاخد الأداء الأفضل من نظام المراقبة بشكل مستمر، هنقوللك دلوقتى على 14 نصيحة للصيانة لازم تتأكد منهم وتعملهم بشكل دورى:

1- نضف عدسات الكاميرات

إتاكد دايما من نضافة عدسات الكاميرات الداخلية والخارجية الموجودة فى المكان، بص على الغبار وأي علامات للمياه وأي أوساخ موجودة على إزاز العدسة الخارجى، إبدأ تنضيف العدسات بإستخدام ضغط الهواء (كومبريسور/بلاور) لو متاح عندك، لو مش موجود يبقى تبتدى تنضيف بفوطة ميكروفايبر ناشفة الأول وشيل كل الأوساخ بعد كده ممكن بأى منظف للإزاز " ترش على الفوطة وتمسح العدسة تانى ترش على الفوطة وتمسح العدسة براحة " ما تحطش المنظف مباشرة على إزاز العدسة علشان ما يحصلش تسريب داخل الكاميرا.

2- إتأكد من مجال رؤية الكاميرات الخارجية حوالين المكان

 بص على إتجاه رؤية كل الكاميرات الخارجية وإتأكد إن مافيش أي حاجة تمنع عنها مجال الرؤية. زى أفرع وأوراق الأشجار والنباتات اللى حوالين الكاميرات، أو لو حد علق يافطة أو بانر قدام الكاميرا، علشان الكاميرا تكون كاشفة المساحة اللى بتغطيها كاملة.

3- إتأكد من علبة حماية الكاميرا ال (Housing)

لو مركب هاوسينج لزيادة حماية الكاميرا من عوامل الجو، إفتحه وإتأكد إن مفيش أى علامات لتسريب الميه أو تكثيف بخار أو غبار، علشان تعرف هل الكاميرا محمية كويس ولا لأ؟

4- إتأكد من علامات الصدأ

راجع على كل توصيلات الإشارة والباور، ولو لقيت واحد فيهم مصدى نتيجة عوامل الجو أو إنه بقاله فترة طويله بدله على طول بواحد جديد علشان ما يأثرش على باقى النظام.

5- إتأكد إن كل الكابلات والوصلات متوصلة كويس

راجع على التوصيلات كلها، بما فيها الوصلات من ناحية شاشة العرض وال DVR مش بس من ناحية الكاميرات وإتأكد إنها متوصلة بشكل مظبوط وواصل لها كهرباء ومش مهزوزة، وكمان إتأكد من الكابلات إنها مش متجرحة أو مقطوعة بشكل جزئى والنحاس باين منها ولو لقيت كده إعزلها على طول بشريط اللحام أو ركب كابل جديد لو كان القديم متهالك.

6- إتأكد من تغذية الكهرباء (Power Supply)

راجع على الباور سابلاى اللى بيغذى الكاميرات وال DVR فى مكانك عشان تتأكد إن مفيش أى فقد فيه وإنه مغذى السيستم بالكهرباء كويس عن طريق الأفوميتر لو موجود عندك كل كاميرا بتحتاج ل 1 أمبير فى الأحوال الطبيعية أو 2 أمبير لو المسافة طويلة شوية عن ال DVR. المشاكل دى بتظهر فى الباور نتيجة الزيادة المفاجئة فى كهرباء المكان أو الإنقطاع المفاجىء والمتكرر للكهرباء أو التلاعب فى الجهاز .

وكمان لو مركب جهاز مانع إنقطاع التيار الكهربى (UPS) أو بطارية خارجية مع الباور سابلاى إتأكد إنها مشحونة كويس وبتشحن بشكل سليم بإنك تفصل فيشة الكهرباء وتشوف سيستم المراقبة هيشتغل معاك كويس على البطارية أو ال UPS زى وهو واصل على الكهرباء مباشرة ولا هيحصل مشاكل.

7- نضف جهاز التسجيل (DVR/NVR) من الغبار

بإستخدام بلاور أو مينى كومبريسور وبعدها بفوطة ميكروفايبر طير كل الغبار الموجود جوه جهاز التسجيل واللى بيتراكم جوه الجهاز بمرور الوقت زى أى جهاز كهربى لأن الغبار بطبيعة الحال بيمنع التهوية الجيدة للجهاز واللى بيأثر على أداءه على المدى الطويل.

8- إمسح كل محتويات الهارد ديسك

هابتدى النقطة دى بتحذير مهم "ما تعملش كده إلا بعد ما تتأكد إنك مش محتاج أى تسجيلات من الهارد" وأكيد هتسأل ليه إنت محتاج تعمل كده مع إنك مشترى هارد بيدعم تسجيلات الفيديو 24 ساعة. والإجابة هو إن ده إجراء وقائى بيطول فى العمر الإفتراضى للهارد ديسك، تخيل كده الهارد من أول ما جبته وهو مليان وعمال يسجل وما بيريحش أبدا ويطبع الفيدوهات القديمة على الجديدة بإستمرار، إعادة تهيئة الهارد لضبط المصنع بيحافظ عالميديا بتاعة الهارد وبيديله فرصة إنه يتنفس وتقدر تعمل ده مرة كل 3 شهور مثلا وتانى هأقوللك ده إجراء وقائى للحفاظ على الهارد لفترة أطول.

9- إتاكد من خاصية تسجيل الفيديو مرة فى الأسبوع على الأقل

إفتكر دايما إنك مركب كاميرات مراقبة فى مكانك علشان لو لا قدر الله حصل أى حدث فى المكان تقدر ترجع للتسجيلات وتشوفها، فلازم تكون دايما متأكد إن سيستم المراقبة بيسجل ومش فاصل، علشان لو حصل حاجة تكون دايما مأمن نفسك وعندك تسجيل للحدث وما تفقدش ثقتك وإعتمادك على نظام المراقبة.

10- بصفة دورية راجع على موقع الكاميرات

ده لازم تعمله علشان تتأكد من الموقع المثالى للكاميرات بناءا على الحركة اللى بتحصل فى مكانك وحواليه، ولو كادر الكاميرا مش كامل وعندك الإمكانية يفضل إنك تزود كاميرا كمان علشان ما يبقاش فى نقط ميتة ومش متراقبة حوالين أو داخل مكانك وما تقولش إنها مش مهمة لأأن دى هى نقط الضعف فى أى نظام للمراقبة واللى ممكن تُستغَل ضدك.

11- راجع على إضاءة المكان

إتأكد من إن الأماكن المهمة لمراقبتها موجود فيها الإضاءة الكافية لتوضيح الرؤية علشان تسهل عليك التعرف على أى شخص أو شىء مريب بيحصل جوه أو بره مكانك وممكن برضه تعمل زى ما قولنا فى الخطوة رقم 10 وهو إنك تزود كاميرا مخصوص علشان تغطى أى مساحة مش متراقبة كويس أو بعيدة جدا عن الكاميرا اللى شايفه المساحة دى والتفاصيل فيها بتكون ضعيفة مش واضحة.

12- دايما إتأكد إن التاريخ والوقت على ال DVR مظبوطين

بشكل يومى راجع على الوقت والتاريخ على ال DVR وخاصة بعد أى إنقطاع كهربى بيحصل للسيستم ولو فيه مشكلة فى بطارية البوردة الداخلية لل DVR برضه بتسسب نفس مشكلة التاريخ والوقت.

13- علق ملصقات فى مكانك " المكان مُراقب بالكاميرات "

بأقل تكاليف ممكنة تقدر تطبع إستيكرات تعرف فيها الناس إن المكان متراقب بالكاميرات، وده بيساعدك على التخلص من بعض المخاطر بتأكيدك إن المكان بتاعك متراقب، اليفط دى  بتخلى أى حد يفكر يقتحم المكان أو يحاول يسرق منه إنه يفكر أكتر من مرة قبل ما يعمل كده، ولو أصر على السرقة بيكون تحت ضغط التخلص من الدليل اللى عليه واللى فى أغلب الأحيان هياخد منه وقت طويل وهيعرضه هو لخطر إنه يتمسك.

14- إتأكد من إنك تعمل صيانة مكثفة بشكل دوري واللى بتشمل الفحص والتنضيف والإصلاح سواء هتعملها بنفسك أو عن طريق شركة متخصصة

عندك مستويات كتيرة من خطط الصيانة الدورية علشان تحافظ على نظام كاميرات المراقبة والأمان فى مكانك فيه منها اللى تقدر تقوم بيه بنفسك وفيه منها اللى محتاج لشركة متخصصة واللى بتقدمهالك شركة #Login فى صورة عقود صيانة على حسب إحتياجك زى إستبدال المعدات اللى فيها عطل لحين الصيانة، والصيانات المفاجئة نتيجة الأعطال المفاجئة اللى ممكن تتعرضلها وإمكانية الإستبدال الفورى لقطع الغيار التالفة وكل ده بتكلفة وأسعار رمزية.

تلخيص فى جملتين، صيانة نظام المراقبة فى بيتك أو شركتك بيستهلك وقت، بس الحفاظ على ممتلكاتك من أى مخاطر ممكن تحصل هو التحدى الأكبر اللى يستاهل إنك تضحى علشانه بأى وقت، علشان كده نظام المراقبة عندك محتاج بشكل مستمر لصيانة دورية منتظمة علشان تضمن صورة واضحة ونقية وتسجيلات فيديو مستمرة بدون أى أعطال مفاجئة ومراقبة وتغطية كاملة لمكانك.