ليه جودة تسجيلات كاميرات المراقبة عندى ضعيفة ومش واضحة؟

5 أسباب تخلى جودة تسجيلات كاميرات المراقبة عندك ضعيفة ومش واضحة؟

فى زمن الأفلام والشاشات ال 4k، الناس بتسأل ليه كاميرات المراقبة عندى جودة التسجيلات بتاعتها ضعيفة؟

ده طبعا بيرجع لعوامل كتير ممكن تكون الأسباب اللى تحت واحد منها وخليك فاكر إنك إشتريت وركبت كاميرات مراقبة فى مكانك علشان تفضل تسجل طول اليوم وكل يوم عشان تحميك من السرقة والتخريب أو أى أحداث غير مرغوب فيها إنها تحصل فى مكانك...علشان كده حاول تركز فى البوست وتعرف العيب منين وتتصرف بسرعة علشان كل حاجة تبقى واضحة قدامك...

1- كاميرات مراقبة قديمة ومتهالكة

السبب الرئيسي إن تسجيلات المراقبة عندك جودتها ضعيفة هو إن سيستم المراقبة عندك أصلا قديم. الكاميرات الأنالوج (TVL) و كاميرات ال 1 ميجا دلوقتى مابقتش تدي جودة التصوير اللى معظم الناس بيطلبوها النهاردة، الكاميرات الأحدث بجودة 2، 3، 4، 5 و8 ميجا المتاحة فى السوق حاليا هى اللى تقدر تديك جودة الصورة اللى ترضيك وتتعرف من خلالها على الأشخاص والأشياء وطبعاً كل ما تزود فى جودة الصورة كل ما هتحتاج تزود فى مساحة التخزين.

2- جهاز ال (DVR)

أجهزة التسجيل بتسجل فى الغالب من 7 ل 10 أيام متواصلة وده طبعا بيحتاج لمساحات تخزين كبيرة على الهارد ديسك وبعض الناس بيلجئوا فى بعض الأحيان إنهم يقللوا جودة التسجيل للكاميرات علشان تزود معاهم عدد أيام التسجيل ودى حاجة غريبة الصراحة مش عارف هما بيعملوا كده ليه!! وسبب تانى هو إن ال (DVR) من الأساس ما بيسجلش بجودة أعلى من 1 أو 1.3 ميجا حتى لو كانت الكاميرات اللى واصلة عليه 2 ميجا أو أعلى.

3- الإضاءة

الإضاءة الغير كافية فى النهاية برضة بتؤدى لجودة تصوير تسجيل ممكن ما تعجبكش، طبعا كل كاميرا بتبقى محتاجة كمية ضوء معينة وخاصة فى التصوير الليلى وكل ما الكاميرا تاخد إضاءة مظبوطة هتديك صورة أفضل. وأحسن طريقة عشان تضمن إضاء مناسبة للكاميرا هى إنك تزود كشافات إنارة فى مكان الكاميرات أما بالنسبة للتصوير الليلى تقدر تزود كشافات ليد (IR) وبتكون طبعا إضاءة غير مرئية بالنسبة للعين البشرية لكن بتزود معاك مدى الرؤية الليلية ووضوح الصورة فى الضلمة بالنسبة للكاميرا.

4- الكابلات

إنت ممكن تكون بتعانى من مشكلة جودة الصورة نتيجة للكابلات المستخدمة فى التوصيل لأنها مسئولة عن نقل الإشارة أو الداتا من الكاميرا لأجهزة ال DVR والهارد ديسك. لو الكابلات إتعرضت للقطع الجزئى أو التجريح أثناء التركيب أو الكابلات المستخدمة جودتها ضعيفة ورخيصة أو تهالكت مع مرور الوقت جودة التصوير أكيد هتتأثر للأسوأ بشكل كبير، إحتمال تانى وهو إن الكابل طويل بزيادة عن اللزوم وده هيسببلك مشاكل فى ضعف الإشارة اللى جايه من الكاميرات وبطىء فى نقل البيانات واللى برضه هيأثر على وضوح الصورة وجودتها.

5- عدسة الكاميرا

حاجة تانية تتأكد منها هى عدسة الكاميرا، كل الكاميرات بيتم تصنيعها بمعدل حماية (IP66/IP67) ولو جودة الكاميرا كويسة ومن براند قوى بتحمى الكاميرا من أى رطوبة أو أتربة ومع ذلك أى حاجة ممكن تحصل والغبار وبخار المياه ممكن يدخل لمكان العدسة نتيجة لعوامل الجو القوية. ولو الكاميرا اللى عندك بعدسة (Varifocal) وهى الكاميرات اللى بتخليك تقدر تعمل منها زووم على مكان معين بس ممكن الكاميرا ما تعملش (Auto focus) عشان تظبط الصورة وبالتالى طبعا تفقد وضوح الصورة.