9 أخطاء شائعة فى تأسيس وإنشاء شبكات المعلومات والداتا سنتر
9 أخطاء شائعة فى تأسيس وإنشاء شبكات المعلومات والداتا سنتر
تمديد كابلات الشبكات حاجة من الحاجات اللى ممكن تبدو إنها سهلة فى مرحلة التخطيط على الورق وبمجرد ما تبتدى تنفذ على أرض الواقع بتظهر الصعوبات والمشاكل واللى معظم الناس بيتجاهلوها ومش عارفين هى ممكن تكلفهم أد إيه على المدى البعيد. وهتلاقى نفسك بتدفع تكاليف زيادة واللى مكانش المفروض إنك تدفعها أصلا وتعطيل الشغل والأداء الضعيف والبطىء للشبكة وتضييع وقت كبير فى إجراءات الصيانة واللى كان ممكن توفره لو الشغل كان اتعمل صح من الأول.
ودى قائمة صغيرة بالأخطاء الشائعة فى تركيب وتمديد شبكات الداتا واللى بسبب تجاهلها هيقابلك مشاكل كتيرة فى المستقبل:
1- الفشل فى التخطيط (عدم الاهتمام بالتخطيط)
قبل ما تبتدى فى تمديد وتوصيل كابلاتك بين الراك وكل جهاز فى شركتك أو مصنعك.إنت محتاج تعرف الأول إزاى كل شىء هيتم وتحدد مسارات الكابلات بين الراك والنقط الخارجية وعدد الكابلات فى المسار حاليا وتعمل حساب لو هتزود كابلات مع توسع نشاط شركتك وإحتياجاتك ف المستقبل. تصميم وتخطيط الكابلات ومساراتها هى أول خطوة لازم تعملها علشان تنشىء شبكة معلومات فى شركتك أو مصنعك.
2- عدم تنظيم وترقيم الكابلات فى الراك
هنا بتبدأ أغلب المشاكل. إوعى تتوقع إنك يكون عندك شبكة بأداء عالى وفعال لو أنت مش منظم ومرقم كابلات الشبكة بشكل مظبوط وصحيح. ده معناه انك لازم تقوم بعمل المطلوب من ناحية ترقيم كابلاتك وتنظيمهم بطريقة تسمح لك بالتعرف على أى كابل منهم من الطرفين بمنتهى السهولة ( طرف الراك وطرف المخرج ). واللى هتسهل عليك وفريق عملك ف المستقبل فى موضوع إكتشاف أعطال الكابلات والصيانة هتاخد منك وقت أقل بكتير.
3- تجاهل أطوال الكابلات
بشكل عام 100 متر هو الطول القياسى لأي كابل شبكات واللى ما ينفعش تتعداه وانت بتمدد الكابلات فى شبكة شركتك حتى لو حد أقنعك بعكس كد وعمل إختبار وتيست للكابل قدامك. وعشان كده التخطيط الجيد لمسارات الكابلات واختيار المكان المناسب للراك مهم جدا قبل البدء فى التنفيذ زى ما قلنا قبل كده.
4- تمديد كابلات الشبكة موازية لكابلات الكهرباء
المجال المغناطيسى الناتج من كابلات الكهرباء بيأثر بشكل مباشر على أداء كابلات الشبكة وبيسبب بطء شديد فى نقل البيانات والمعلومات ولو لا بد إنك تعدي بمسارات الكابلات جنب كابلات كهرباء يبقى تعديهم بشكل عمودى على بعض مش موازي عشان ما تأثرش عل أداء الشبكة.
5- عدم إختبار كابلات الشبكة قبل التشغيل
بمجرد إنتهائك من تركيب وتوصيل الكابلات، وفرحتك بإن خلاص الشغل خلص، ما تنساش تعمل إختبار لكل الكابلات اللى انت ركبتها حتى لو مش هتستخدمها دلوقتى وعاملها احتياطى للمستقبل قبل توصيلك لأى جهاز على الباتش بانل، ده هيساعدك إنك تكتشف أى أخطاء فى التوصيل انت فوتتها علشان مش تحير نفسك بعد توصيل الأجهزة وماتبقاش عارف العطل جاى منين أو تُفاجأ بيه فى المستقبل.
6- عدم فصل كابلات الباتش كورد الغير مستخدمة عن الباتش بانل
ما تسيبش باتش كورد مش هتستخدمه واصل فى الباتش بانل وانت عارف ان مفيش جهاز واصل على النقطة دى أساساً لأنه غالبا هيدوخك وانت بتعمل صيانة لأن مفيش حد يجرؤ يفصل باتش كورد متصل فى الباتش بانل لانه متخيل ان فيه جهاز متوصل من الناحية التانية وكمان البورت بتاعها على السويتش هيبان انه فاصل وده هيخليك تشك ان فيه مشكلة فى الكابل.
باختصار لومفيش جهاز واصل على نقطة فى الباتش بانل يبقى تفصل الباتش كورد منه.
7- عدم التخطيط لصيانة وتحديث الشبكة فى المستقبل
عملية تركيب الشبكة بتكون جيدة وناجحة طول ما هى شغالة، بس الإختبار الحقيقى لمرونة والإعتمادية على المدى الطويل لأى شبكة معلومات بيتحدد بمدى سهولة صيانتها وإصلاحها، الفشل فى التخطيط للصيانة وإستبدال الكابلات والمعدات فى المستقبل بيتحول لأسوأ سيناريو ممكن تواجهه مستقبلياً فى حالة حدوث أى أعطال أو تحديثات جديدة للشبكة.
ومن بعض أمثلة الفشل فى التخطيط للمستقبل والتجديد والتحديث للشبكة:
- تمديد الكابلات من خلال أماكن صعب الوصول ليها مستقبلاً بعد التمديد.
- عدم ترك مساحة كافية لإزالة الكابلات القديمة والمتهالكة، واللى بتضطر بسببه إنك تسيب الكابلات دى مكانها أثناء تبديل أو إزالة أجهزة الشبكة واللى بينتج عنه إزدحام وتشابك الكابلات وزيادة تكاليف إزالة الكابلات القديمة وإستبدالها بالجديدة.
- عدم التخطيط الجيد لتنظيم الكابلات فى الداتا سنتر بيؤدى لزيادة وقت الصيانة والإصلاح وكمان زيادة مدة تعطيل وتوقف الشبكة عند حدوث أى مشكلة.
8- إتخاذ قرار شراء الأجهزة والكابلات بناءً على السعر فقط
مع وجود المكونات اللى جودتها قليلة وعمرها الإفتراضى قصير، غالباً بيكون منطقى بالنسبة لك إنك تاخد قرار الشراء بناءً على السعر، خاصة لو أدائها هيكون كافى على مدار عمرها القصير، ومع ذلك كابلات ومكونات الشبكات الجيدة واللى عمرها الإفتراضى طويل بتتطلب رؤية جيدة للدقة فى درجات إختلاف جودتها وأدائها.
طبعاً مش بتتجاهل موضوع سعرها تماماً بس لازم تحط فى حساباتك بعض المشاكل والإختلافات زى العمر الإفتراضى لكل منتج، وتكلفة إستبدال المكونات فى حالة تهالكها وكمان تكلفة صيانتها ما تحسبش الموضوع بس من ناحية سعر المنتج.
9- تجاهل المشاكل المعروفة
مشاكل كتير فى شبكة المعلومات فى أى شركة بيتم ملاحظتها بسرعة وبيتقال عليها إنها بسيطة وبيتم تركها، ف بتكبر مع مرور الوقت، مشكلة تنظيم الكابلات فى الداتا سنتر تعتبر مشكلة إعتيادية لأى شركة لما بيتم ملاحظتها لأول مرة، وبتكون محصورة فى بعض الراكات وممكن حلها بمنتهى السهولة وبدون أى صعوبات سواء عن طريق موظفين ال IT فى الشركة أو بالتعاقد مع شركة خارجية.
ومع تجاهل المشكلة بتبتدى تتوسع أكتر وأكتر والإطالة فى عملية الصيانة بيؤثر بالسلب على الأداء اليومى للشبكة وطبعا التكلفة المطلوبة للإصلاح والتنظيم بتزيد مع زيادة إزدحام الكابلات وتشابكها.
وبالطبع ما فيش أى مشكلة بيتم حلها فى الحال نتيجة لإنشغالك بأعمالك الحالية أو ضغط الشغل فى بعض المواسم وبيكون الأفضل هو تأجيل عملية الصيانة، بس على الأقل بمجرد ملاحظة المشكلة والتعرف عليها المفروض عليك البدء فى التخطيط لحلها.
طبعاً صعب جدا حصر جميع الأخطاء فى التدوينة دى فقط، وخاصة إن تم إنشائه بناءاً على المشكلات اللى كانت بتواجه فريق العمل فى Login Technology أثناء عمليات الصيانة والإصلاح للشبكات والداتا سنتر.
مشاكل كابلات الشبكات شائعة وكتيرة جداً عن ما إنت ممكن تتخيل وطبعاً مكلفة لو تم تجاهلها ولذلك بننصح دايماً بالتعامل والعمل مع المتخصصين فى مجال تركيب وصيانة الشبكات واللى تقدر تثق فيهم وفى خبرتهم بالمجال.
لو عاوز تتأكد إن شركتك خالية من أى مشاكل فى كابلات الشبكات، تواصل معنا الآن أو سيب سؤالك ومشكلتك تحت فى الكومنتات وإحنا هنرد عليك بحلها.
تعليقات
إرسال تعليق