تجنب المشاكل المكلفة للشبكات.. إحترم البنية التحتية
 |
| المشاكل المكلفة للشبكات |
تجنب المشاكل المكلفة للشبكات.. "إحترم البنية التحتية"
أصحاب ومديرين الشركات الناجحة دايما بيحبوا يستخدموا أحدث التقنيات والبرامج المتاحة فى السوق جوه شركاتهم لتقديم أفضل خدمة لعملائهم، مين يقدر يلومهم إنهم عاوزين يكونوا الأفضل؟
طب هتشتغل وتنافس بعربية سباق ولا "زووبة" ؟
أصحاب الشركات عاوزين يطبقوا أحدث وأكفأ التقنيات والتطبيقات واللى بتبقى محتاجة أجود منتجات وتقنيات الشبكات، بس فيه سؤال مهم جدا وإجابته هتفرق كتير، هل ينفع متسابقين العربيات يدخلوا سباقات بأسرع وأحدث مواتير ويروح يقرر إنه يشترى أرخص كاوتش لعربيته؟
أكيد مش منطقى، لعده أسباب:
- شغلك هيكون أفضل بنفس مقدار جودة الأساسات اللى إنت معتمد عليها.
- هيكون فيه تأثيرات سلبية كبيرة على الأداء والكفاءة وإعتمادك على التأسيسات.
- وطبعا مش هيكون فيه أى حماية وضمانات على أى إستثمار جديد فى البرامج والتطبيقات الحديثة.
نفس الموضوع بالنسبة للشبكة فى شركتك
مثال عربية السباق زى البنية التحتية لشبكة شركتك بالظبط، والتشابه هو إن كابلات الشبكة هى كاوتش العربية. والحقيقة المُرَّة إن أغلب أصحاب الشركات ومديرينها بيتجاهلوا تماماً مدى كفاءة البنية التحتية للشبكة ومع ذلك عاوزين يضيفوا عليها أحدث التقنيات والتطبيقات اللى هتساعدهم فى شغلهم وطبعا ده بيعرضهم لخساير كبيرة وكارثية فى شغلهم.
سواء إنت على دراية بده أو لأ، الحقيقة هى إن معظم مشاكل وتوقف الشبكات عن العمل بتحصل بسبب الكابلات والبنية التحتية بتاعتها.
والغلطتين الأساسيين اللى أغلب الناس بتعملها هما:
- شراء كابلات رخيصة وجودة قليلة
ودي أكبر غلطة ممكن إنك تعملها فى حق شركتك، لأن مش كل كابلات ومستلزمات الشبكات متصنعة بنفس الجودة، لو شركتك بتعتمد بشكل أساسى على الشبكة وإنت أكيد عارف ده أكتر من أى حد، يبقى إنت كده بتراهن على مستقبل شركتك وإنت بتشترى كابلات رخيصة. التفاوت فى الأسعار بين المنتجات ده بيقابله نفس التفاوت فى الجودة والكفاءة بينهم، السؤال هنا ليه تستثمر فى شبكة الشركة وتضيف ليها أحدث وأغلى التطبيقات والبرامج وإنت عارف إن الشبكة مش هتستحملهم بسبب ضعف البنية التحتية ليها؟
- كابلات "ملعبكة" ومش منظمة
زى أى حاجة فى حياتنا، عدم التنظيم دايما بيعمل مشاكل. وكمان، هتصعب عليك مهمة الصيانة والدعم الفنى فى وسط فوضى الكابلات دى.
إستثمارك فى شبكة وكابلات منظمة ومترتبة هيحسسك بفرق كبير جداً فى إنك توصل لأى مشكلة فى الشبكة وهتوفر عليك وقت ومجهود كبير وإنت بتصلحها.
لو إنت عاوز تاخد كفاءة وأداء عربية السباق من الشبكة بتاعتك، فإنت محتاج لكابلات ومستلزمات لشبكتك جودتها عالية وده هيكون الأساس اللى تقدر تبنى وتزود عليه كل التقنيات والبرامج الحديثة وتضمن إنها تكون شغالة بأعلى مستوي من غير ما تكون قلقان من النتايج وكمان تضمن إن الفلوس اللى هتدفعها مش هتروح هدر.
جنيه قصاد جنيه، دي ممكن تكون أفضل طريقة للإستثمار فى شبكتك.
تعليقات
إرسال تعليق