دليلك لشراء كاميرات المراقبة

دليلك لشراء كاميرات المراقبة

لو إنت بتشترى كاميرات مراقبة لأول مرة أو حتى عاوز تعمل تحديث للسيستم اللى عندك ومعندكش المعرفة الكافية اللى تقدر بيها تختار الكاميرات المناسبة لمكانك أكيد الموضوع مش هيكون سهل زى ما إنت متخيل لأن أكيد آخر حاجة إنت تتمناها هى إنك تشترى سيستم مراقبة وينتهى بيك الحال مع نظام مراقبة عديم الفايدة مش قادر تشوف منه حاجة....  بس ما تقلقش لو كملت قراءة البوست هتلاقى كل اللى إنت محتاج تعرفه عشان تقدر تحدد إنت بتدور على مواصفات إيه بالظبط وإزاى ومنين تبتدى تدور.. 
فمبدأياً كده لازم تكون عارف هو بيتكون من إيه الأول

أى سيستم كاميرات مراقبة كامل بيكون مكون من:
- جهاز العرض والتسجيل (DVR) أو (NVR). 
- الكاميرات بأنواعها (HD) أو (IP).
- هارد ديسك للتسجيل .
- الكابلات (Coaxial) أو (UTP).
- باور سابلاى (Power Supply).
- شاشة للعرض.
- كابل (HDMI) أو (VGA) لتوصيل الشاشة. 

ودلوقتى ندخل بقى على أنواع  أنظمة كاميرات المراقبة وعندك 3 أنواع منهم هما:

- الأنالوج الإعتيادى xx
- الأنالوج عالى الدقة (HD Analog)
- الكاميرات الآى بى  (IP)

الأنالوج العادى وده أقلهم سعرا وما أنصحكش بشراءه لأنه برضه أقلهم فى جودة الصورة. بعد كده هتلاقى الأنالوج إتش دى (Analog HD) وده طبعا النوع الأكثر إنتشارا وطلبا فى السوق لأنه بيجمع بين الجودة العالية والسعر المناسب وليه أنواع تقنيات مختلفة زى ال (HDTVI) واللى بتشتغل بيها كاميرات Hikvision و AVTech و (HDCVI) واللى بتشتغل بيها كاميرات Dahua و (AHD) ودى التقنية الأكثر إستخداما من المصنعين فى الكاميرات عالية الدقة (وهنتكلم عن الفروقات بين التقنيات الثلاثة بشكل أكبر بس فى بوست منفصل) وبيتم إستخدام الكابلات المحورية (Coaxial) ووصلات ال (BNC) وسلكين كهرباء فى توصيلها بجهاز التسجيل (DVR).

أما الكاميرات الشبكية (IP) فهى أحدث الكاميرات اللى متاحة فى السوق دلوقتى وبتشتغل بنفس الكابلات المستخدمة فى توصيل الإنترنت والشبكات (Ethernet Cables) وجودة الصورة بتاعتها بتوصل ل (4K) اللى هي 8 ميجا بيكسل وبرضه بيستخدم فى توصيلها كابلين واحد للصورة وواحد للكهرباء وفيه منها أنواع تانية فى التوصيل بال (NVR) زيى الكاميرات ال (POE: Power Over Ethernet) كابل واحد فقط صورة + كهرباء أو ال (WIFI) بدون كابلات فى نقل الصورة وبتحتاج تتوصل بالكهرباء فقط.

ال (DVR) مقارنة بال (NVR) 
وده من أهم أجزاء نظام المراقبة وعليه عامل كبير جدا فى تحديد جودة وسعر النظام وإذا كان السيستم اللى هتشتريه هيديلك النتايج المطلوبة منه ولا لأ.. وهو الجهاز المسئول عن عرض الفيديو اللى جاى من الكاميرات ومعالجتها وظبط جودتها وتسجيلها على الهارد علشان تقدر تتفرج عليها بعد كده .

طبعاً كل براندات ال (DVR) أو ال (NVR) دلوقتى مزودة بخاصية المراقبة عبر الإنترنت عن طريق الموبايل واللاب توب والتنبيهات على الإيميل فى حالة حدوث حركة والتخزين السحابى على الإنترنت بدل التخزين على الهارد ديسك... بس أهم حاجات تخلى بالك منها فى أجهزة التسجيل بنوعيها هى جودة العرض وجودة التسجيل وعدد الفريمات فى الثانية (fps) أثناء التسجيل لأك بمنتهى البساطة ممكن تشترى كاميرات 2 ميجا بس مركبهم على DVR "بيعرض" بجودة 2 ميجا ولكنه "بيسجل" على الهارد بجودة 1 أو 1.3 ميجا ووقت ما تحتاج التسجيلات نلاقى الصورة سيئة جدا وكمان عدد الفريمات فى الثانية هيخلى الصورة بتقطع ومش هتقدر انك تتابع الأحداث بسهولة وده اللى انت ممكن تلاحظه فى الإعلانات اللى بتظهرلك تلاقى هى هى نفس مواصفات العرض ونفس البراند بس واحد أغلى من التانى..خليك دايما فاكر إن الجودة مقابل السعر مفيش حاجة فى الدنيا إسمها أعلى جودة وأرخص سعر.

المواصفات اللى المفروض تحطها فى إعتبارك وإنت بتشترى

- مقاس العدسة وزاوية الرؤية: مهم جدا تكون عارف ومحدد إيه الأماكن اللى انت عاوز تغطيها بالمراقبة ومقاس العدسة هو اللى بيحدد ايه البُعد أو الكادر اللى الكاميرا هتشوفه. مقاس العدسة الأكبر هيخلى الكاميرا تشوف أبعد بتفاصيل واضحة ولكن زاوية وكادر التصوير للكاميرا هيكون أصغر والعكس صحيح مقاس العدسة الصغير هيزود مساحة وزاوية الرؤية ولكن المسافة والبعد اللى هتشوفه الكاميرا هيكون أقصر. وعندك 3 أنواع من الكاميرات بناءاً على نوع العدسة

- كاميرات بعدسة ثابتة: وباين من إسمها إنك ما تقدرش تغير فيها وبتعتبر الأرخص فى الأنواع التلاتة والأكثر إستخداماً فى أنظمة المراقبة
كاميرات بعدسة متغيرة (Varifocal): ودى بتسمحلك كمستخدم للكاميرا إنك تغير فى زاوية الرؤية والبُعد اللى الكاميرا ممكن توصله وليها إستخدامتها وتطبيقاتها على حسب الإسترتيجية التأمينية اللى هتطبقها وتعملها فى مكانك.

- الكاميرات ال (PTZ): ودي أغلى الكاميرات من حيث نوع العدسة وبالإضافة لتحكمك فى زاوية الرؤية وبعد المسافة الكاميرا كمان بتقدر تتحرك وتلف فى الإتجاه الأفقى والرأسى وتقدر تتحكم فيها من خلال جهاز التسجيل أو من تطبيق الموبايل أو (Joy Stick) خاص بيها وموجود بيها تقنيات كتير جدا هتساعدك على تطبيق إسترتيجيات تأمين على مستوى عالىوبيتم إستخدامها لتأمين الأماكن المفتوحة واللى مساحتها كبيرة نظرا لإمكانيتها الرهيبة زى المصانع والمبانى التجارية والجراجات وواجهات الفيلات.

- وضوح الصورة (ميجابيكسل): التفاصيل اللى انت محتاج تصورها وتراقبها بتعتمد بشكل كبير جدا على جودة صورة الكاميرا ووضوحها واللى بتتقاس بال ميجابيكسل وطبعا كل ما زاد عدد الميجا بيكسل كل ما زادت التفاصيل الموجودة فى فيديوهات الكاميرا المسجلة كتير من الناس بيشتكوا انهم لما بيعملوا ديجيتال زووم على شخص أو شىء معين فى الفيديو الصورة بتبكسل وما بيقدرش يحدد ويتعرف على أى تفاصيل وده سببه الأساسى هو ضعف وضوح الصورة اللى جاية من الكاميرا لأن الميجابيكسل بتاعها قليل. يعنى كل ما زادت عدد الميجابيكسل فى الكاميرا كل ما كان عندك الإمكانية إنك تعمل زووم أكبر على الصورة بدون فقد يذكر فى الوضوح. عشان كده قبل ما تشترى الكاميرات لازم تحدد إنت عاوز تشوف التفاصيل على بُعد أد ايه من الكاميرا؟ وكمية ووضوح التفاصيل اللى إنت عاوز تشوفها.   

- الرؤية الليلية: طبعاً كل الكاميرات دلوقتى بقت مزودة بخاصية الرؤية الليلية بس الصورة بتكون أبيض وأسود وبتختلف جودة كاميرا عن التانية فى الرؤية الليلية من قدرتها على جمع الضوء المنخفض والقليل لتكوين صورة واضحة وبتتقاس بوحدة إسمها (LUX) وبتكون فى الغالب قيمته صغيرة جدا زى كده مثلا (0.01 Lux) وكل ما كانت القيمة قليلة كل ما زادت قدرة الكاميرا على التصوير الليلى بجودة عالية وطبعا بما إننا فى عصر التكنولوجيا ف دلوقتى بقى متاح فى السوق كاميرات بتصور ألوان سواء بالنهار أو فى الوضع الليلى بس بتكلفة أعلى طبعا. 

- تسجيل الصوت: لو إنت محتاج إنك تسمع إيه اللى بيتقال فى المكان باإضافة للتصوير فعندك إختيارين علشان تعمل ده إما إنك تشترى كاميرا وفيها ميكروفون (Built-in) أو إنك تركب مايك منفصل بكابل منفصل وتوصله على جهاز التسجيل (DVR/NVR) وعددهم بيتحدد على حسب مداخل الصوت اللى متاحة فى جهاز التسجيل مسبقاً.

- عدد أيام التسجيل على الهارد ديسك: بتختلف مدة التسجيل من سيستم مراقبة عن التانى بناءاً على عوامل كتير غير مساحة الهارد طبعاً. منها جودة الكاميرات بالميجابيكسل وتقنية معالجة البيانات على جهاز التسجيل (DVR/NVR) زى مثلا (H.264/H.264+/H.265) واللى بتختلف فى مساحات وأحجام التسجيل عن بعضها وهنتكلم عنها فى بوست منفصل نظرا لأهميتها وتقدر تخلى حد مختص يساعدك فى إختيار مساحة التخزين المناسبة بناءاً على عدد الأيام اللى إنت محتاج تسجلها.

- شاشة العرض: أغلب الناس بتتجاهل الجزء ده تماماً فى أنظمة المراقبة وبيشتكوا من إنهم إشتروا كاميرات بجودة عالية جدا ومع ذلك مش حاسس بجودة الصورة اللى هو شايفها على الشاشة، والسبب هو إن الشاشة لوحدها بعيدا عن كاميرات المراقبة ليها جودة فى عرض الصورة ما تقدرش تعرض بجودة أحسن منها مهما كانت جودة صورة الجهاز اللى هى بتعرضه. على سبيل المثال لو إنت إشتريت كاميررات 5 ميجا بيكسل وبتعرضها على شاشة (Full HD) فالصورة اللى هتظهرلك على الشاشة هتكون بجودة 2 ميجا بيكسل يعنى الشاشة بتعدل الصورة لجودة أقل عشان تقدر تعرضها ولو إنت عاوز تشوف بجودة ال5 ميجا بيكسل يبقى إنت محتاج شاشة (4K) عشان تستفيد من الإمكانيات العالية اللى إنت دفعت فيها.

طبعاً مواصفات وتقنيات كاميرات المراقبة وأجهزة التسجيل عددها كبير جداً وبتفاصيل كتيرة جدا بس كمبتدىء فى شراء كاميرات المراقبة أو ما عندكش الخبرة الكافية عشان تحدد إحتياجاتك وبتحب دايما تكون فاهم إنت بتشترى وبتدور على إيه فإحنا إتكلمنا فى أهم الحاجات اللى تركز عليها وإنت بتلف وتسأل وطبعا مفيش أفضل من إنك تاخد برأى ونصيحة المختصين فى المجال بس أكيد هتفرق كتير لما يكون سؤالك بناءاً على معرفة. 
وبافكرك فى النهاية قبل ما تبتدى تتواصل مع الشركات اللى بتشوف إعلاناتها تقريبا كل يوم وتسألهم على تكلفة تركيب سيستم المراقبة أو تشوف سعر قليل فتقرر إن ده العرض المناسب ليك.. 

المفروض إنك تسأل نفسك الكام سؤال دول وتحاول تلاقيلهم إجابة:
هل إنت عاوز براند معين فى دماغك؟ ولا مش فارق البراند وأهم حاجة الجودة تكون كويسة؟
إيه هى النتائج اللى إنت مستنيها من تركيب أو تحديث سيستم المراقبة؟
إيه هو عدد الكاميرات اللى إنت محتاجها لتغطية المكان جوه وبره؟
إيه هى الميزانية والتكلفة اللى إنت محددها للشراء والتركيب؟ 

ولو لسه مش قادر تحدد إنت عاوز إيه بالظبط وإيه اللى يحققلك النتايج المطلوبة تقدر تراسلنا أو تكلمنا علشان تستفسر عن كل اللى إنت محتاج تعرفه ودورنا إننا نساعدك بكل الإجابات على أسئلتك